我大約十幾歲之後，佢無本事再虐待我，佢就虐待d動物，曾經有大哥既朋友送咗隻大狗比我地屋企，過咗無幾耐佢就攞隻狗嚟虐待，平時都係我帶隻狗落街散步去廁所，隻狗想去廁所d叫聲唔同，隻狗從來都唔會係屋企痾，一定等我放學帶佢去，仲有去到山邊先痾，唔會係屋邨內，佢有次唔知咩唔高興，唔比我帶佢落去，要佢“頼”係屋企，雙狗真係忍唔住“頼”咗出嚟，當然又係我執手尾
之後有一次佢竟然話帶隻狗落街散步，結果又係變態虐待，叫拖住狗鍊叫“波子，go”，發足狂奔，隻狗跟住佢全速跑，跟住佢突然煞停，隻狗比條狗帶扯住，d腳就係地下磨，好以飄移“綫”軚咁，仲改咗個好好聽既名，叫“磨趾甲”，仲好理直氣壯咁話貓識自己磨趾甲，狗唔識，所以要“幫佢磨”，玩到隻狗腳底d枕損晒
之後有一次去咗個小型寵物展，唔記得係邊，見到有隻一個月大既純種西施，＄８００，佢話鍾意阿媽就買咗比佢，嗰時唔同而家，兩毫子都慳既年代，但係佢要咩，幾貴，阿媽都會買俾佢，（阿媽到而家一直都唔肯認偏心佢而迼成今日佢打横行既局面，d親戚講番當年阿婆阿公都話過佢個仔特別野蠻），阿媽開頭話無可能，佢一定無買過，話我老作嚟屈佢，我話隻狗係我親手埋上山，使唔使我上去挖返條屍出嚟？跟住家姐講咗句“我記得，唔知點解出一次街就抱咗隻狗返嚟囉！”，佢無得唔認，跟住又話隻狗無可能咁貴，“＄１００蚊吓嘛”，到而家都堅持話我屈佢，結果隻狗仔係我地屋企都唔知有無兩個月又比佢整死咗。
隻狗仔本來一直住係屋內狗籠，嗰時冬天，有次寒流，得幾度，佢專登放隻狗仔出門口，門外是半露天的，只有頂部，左右是空礦的，完全食風，我同樓上的女仔唯有放d布入籠中，籠外包了報紙擋風，之後佢出門口見到，發癲咁撕爛晒d報紙，掉走籠中的布，唔比我地整個狗籠，結果隻狗仔“鑑生”凍死，第二朝屍身硬晒，如果隻狗仔比第二個人買就唔使死得咁慘，我親手將佢埋咗係附近既山上面